متل اليوم فلّيت…
يا كبير ..يا ساكن القلب ، يا مرجع بالسياسة والفكر والدين يا موسوعة ثقافية ما الها حدود يا جامع الطوائف بقلبك المحب ، يا شامخ شموخ الارز اللي ما بينحني ..يا سميي…. هيك كنت تقلي بس تدقلي تلفون بالليل لتطمن عني وعن عيلتي ..
اليوم ما جايي ودّعك… جايي سلّم عليك.
لأنو اللي متلك ما بيغيب… بيصير مقياس.
اطمّن… بنتك هلا اللي بتكّبر القلب بالقصر الجمهوري،
بالمطرح اللي كان لازم تكون فيه من زمان.
عينها صارت عينك…
عم تشوف لبنان متل ما كنت تشوفو:
وطن رسالة… مش ساحة نزاع.
وقلبها حامل نفس الوصية:
الكرامة قبل السياسة… والإنسان قبل كل شي.
يا حنون
كنت هيبة بلا استعراض،
وقوة بلا قسوة،
وحكمة بتمشي ع درج بعبدا متل صلا.
بهالزمن اللي بيعلّي الصوت …بيخفّ الوزن…
إنت بقيت ميزان.
بهالزمن اللي بيبدّل وجوهو…
إنت بقيت وجه لبنان الحقيقي.
ما رح يجي متلك…
بوطنيتك اللي ما بتساوم،
بأخلاقك اللي ما بتنكسر،
بمحبتك للبنان اللي ما بتتعب،
وبحنكتك اللي كانت تشوف العاصفة وتعلّمنا كيف نوقف.
نحنا بعدنا منتفيّا بكلمتك،
لما يضيع الحق… منفتّش عن جِمَلك،
ولما يبرد الأمل… منتدفّى بذكراك.
نام… واطمّن يا سميي
لبنان بعدو شايل اسمك متل أمانة،
وذكرك بعدو حارس باب الحقيقة.
إذا الوطن جرح… إنت كنت الضماد،
وإذا الوطن صلاة… إنت كنت النية.
متل اليوم فلّيت…
بس متل كل يوم… بعدك عم تقود البوصلة..
الى اللقاء يا تاج راسنا..🙏😥❤️❤️❤️❤️❤️❤️