علي يوسف
كنت عم فكر اكتب عن يللي صار اليوم بمجلس النواب خصوصا بموضوع الانتخابات البلدية ..بس كل ما لاقي تعبير مناسب دقيق او وصف مناسب ومعبّر تعبير حقيقي استحي اكتبه وقول عيب يطلع مني هيك حكي …؟؟!!!!
ما حدن يقللي انو اختلاف آراء لأن الرأي له علاقة بالفكر مش بالنكاية والنكد ..؟؟؟ وما حدن يقللي اختلاف سياسي الا اذا ما بيفهم شو يعني السياسة ولأن السياسة هيي رؤى و برامج للتحرر و للسيادة و للتقدم وللتنمية مش للتقاتل الرخيص النكدي ..؟؟!! وما حدن يقللي طوائف ومصالح الطوائف لأنه رغم انو الطائفية يللي بتصير مرجع السياسات بتدل على تخلف وجهل بس يللي شفتو انو حتى هيدي الطائفية بهدلوها ونزلوا اوطى من مستواها الواطي اصلا ..؟؟
يللي صار نقاش بتعبيرات طائفية حول انتخابات بلديات تنموية مناطقية ويللي صار بيكشف شي واحد وجود انتشاري للرخص وصولا لأدنى مستوياته وانو هيدا الرخص صار “موضع افتخار وطني “….
في حدن بدو يعمل خلافات طائفية حول خدمات تنظيف المدينة والارصفة وتعبيد الطرقات والانارة واشارات السير ومعاملات رخص يحددها القانون ؟؟؟ على اساس انو الرصيف لازم نعطيه هوية مسلم او مسيحي وهيك كمان الانارة او تنظيف الشوارع الخ… ؟؟؟؟؟
ولأن المجلس البلدي يمكن يكون فيه اكثرية اسلامية لازم نعطي الصلاحيات للمحافظ المسيحي ؟؟ وهيك بتصير المصاري مع البلدية وصلاحيات المشاريع مع المحافظ ؟؟وحلها اذا فيك تحلها وخود على نكد ونكايات وطائفية وطائفيك ودقي مزيكة انحطاط ورخص ؟؟؟؟
في حدن مصرّ ياخد لبنان الى الرخص الوطني و الفكري والسياسي والبنيوي يمكن لتسهيل وتوسيع مدرسة اورتاغوس لتعلم تنفيذ الاملاءات ب “وقاحة وطنية ” ..؟؟؟!!!