صلاة اجدادنا الصباحيّة
صلاة الصبح،
الصبح إلك يا رب،
يا فتّاح يا رزّاق يا مقسّم الأرزاق،
يا عليم يا جبّار خلّصنا من العار والمعيار، ومن ضيم الليل والنهار،
بسبحك يا رب شفافي ولساني والأرض من قدّامي،
بسبحك يا رب الماي بمجاريا والطيور بوكاريا،
بسبحك يا رب الملايكة ع كراسيا والرهبان بقلاليا،
بسبحك يا رب الشمس والقمر بمساريا،
بسبحك يا رب الوحوش بالمغارة والقمح بالكوارة،
بسبحك يا رب الحمّاية والنارة والصاج والكارة،
بسبحك يا رب الجار والجارة وكل أهل الحارة،
الصبح إلك صباح جديد نهار جديد وعز جديد،
خلّصنا من القطوعات والتجارب،
بخاف يا رب من القبر وعتمتو، من الدود ونهشتو، من الميزان وميلتو،
يا رب لا تموّتنا لا حريق ولا غريق ولا تشحشط ع الطريق،
موتة هنية وقربانة طرية بحضن إمنا مريم العدرا الطاهرة النقية
وترحم إمي وبيي وكل اللي تعبو عليي. آمين.
