كاريكاتور واقعي لزيارة اورتاغوس ..؟؟!!
شكل ومضمون الاميركي الصهيوني بيمون ..؟؟
علي يوسف
هلق الكل مشغول بحديث المجتمع حول كيف اورتاغوس اخفت سنسالها يللي حامل نجمة داوود عند الرئيس بري بينما كانت النجمة ظاهرة عند الرئيسين عون وسلام …؟؟
وان كان هالشي بيحمل دلالة مهمة انو بعين التينة بدو الكل يلزم حدوده وما بتمرق الامور ولو كانت شكلية …
ولكن لا شك بأن زيارة اورتاغوس وقحة بالشكل والمضمون :
١- بالشكل لما بتظهر سنسال برقبتها بتعلن فيه عن صهيونيتها بوقاحة بتكون عم تعلن عن عجز المسؤولين اللبنانين وخنوعهم وعدم قدرتهم على رفض استقبالها خصوصا في القصر الجمهوري والسراي الحكومي على اعتبار انها في معراب او في المحلات الشبيهة يمكن يسألوها منين اشترتها حتى يشتروا متلها واذا في اشيا تانية يمكن يشتروها او يلبسوها تبين طاعتهم واستعدادهم لأقصى الذل امام الاميركي – الصهيوني وعداءهم لكل المقاومات او اي شي له علاقة بالمقاومة ؟؟؟؟؟
٢- اما بالمضمون فهونيك العجايب طلع موقف السلطة الموحد هوي انو يقولولها “قديش هني شاطرين وما شيين بخطوات للاصلاح متل ما طلبت منهم مباشرة او عبر صندوق النقد الدولي وما مهم على حساب شو ؟؟؟؟ ” اكد موقف السلطة استعدادها الجيد للفحص يللي رح تعملن ياه هيي مباشرة او صندوق النقد ؟؟؟؟ لدرجة انو سألوها : نحنا شاطرين مش هيك ؟؟؟ “عم نحاول نساوي كل شي بتطلبوه ..بأمرك يا معلمتنا ومنطلب السماح اذا في اي خلل ومستعدين نصحح ؟؟؟؟”””” فرجوها كل شي تحضر او عم يتحضر متل ما بينص الدرس ..!!! براڤو و تصفيق حاد وبون بوان للشباب ..؟؟؟
٣- وطبعا موضوع الاصلاح ما بيقنع اورتاغوس ولا هوي همها الفعلي والتذاكي اللبناني بالاختباء وراء الاصلاح للهروب من موضوعي سلاح المقاومة والمفاوضات مع العدو ما بينفع مع وحدة مقطعة موصلة متل اورتاغوس فاحتمى الموقف الرسمي خلف موقف البطريرة الراعي يللي صرلهم يومين بيهللولو متل ايام اللولو. وكأنه مفتاح الجنة …؟؟!!!!!
ملخص موقف البطريرك هوي “” لانو اسرائيل فيها تعمل يللي بدها باه ولانو المقاومة بعدها قوية والشباب ما ضعفت معنوياتهم فبدنا شوية وقت لنلاقي طريقة لتسليم او نزع سلاح المقاومة والجيش عم يتصرف بذكاء ..!!! رح ننفذ كل شي بدها ياه اسرائيل وكمان اميركا بس مش كن فيكون ياخدونا بحلمهم شوي ..؟؟؟؟”””
موقف عجز وتسليم وتنفيذ واضح لا لبس فيه او شك حتى ماحدن يفكر انو رح ننتفض لسيادتنا ؟؟ اعوذ بالله ..؟؟؟ بس شوي شوي حلمكم علينا وكل يللي بدكن ياه بيصير ؟؟؟؟
في احلى من هيك وحدة وطنية ووفاق وطني تحت سقف الولاء وتنفيذ طلبات العدو ؟؟؟؟؟
انشالله يبقى الوفاق الوطني والوحدة الوطنية .. ماحدن بيزعل من الوفق …بس الاهم منهم انو يضل في وطن (عفوا بلد) يعملوا فيه وفاق بعد يللي جايي بحزيران ؟؟؟؟
شوفوا هالفرق البسيط نحنا بعدنا عم نفتش كيف منسجل نقاط وكيف اذا الفريق الاميركي بالسلطة نجح بتلبية الطلبات الاميركية الصهيونية بيكون انتصر داخليا بوقت مش عم نسمع منيح ولا نفهم انو نتنياهو كل يوم بيقول انو هدفه مش بس انهاء القضية الفلسطينية بل تغيير الشرق الاوسط وخرائط جديدة …!!؟؟؟؟
يبدو في ناس مش فرقانة معها اذا الصهاينة اخدوا لبنان او اذا تقاسموا الصهاينة والاتراك لبنان بيحاولوا متل العادة ياخدو جنسية لبنانية اما بالقسم الصهيوني او بالقسم التركي ..؟؟!!!
قال دنب الكلب حطوه بالقالب ٤٠ سنة ضل اعوج .. اي بسيطة لبنان اعطوه استقلاله ١٠٠ سنة وما قدروا اللبنانيين يعملوا وطن ؟؟؟؟؟